ਸੈਕਰਾਮੈਂਟੋ- ਅਮਰੀਕਾ ਵਿਚ 8 ਨਵੰਬਰ ਨੂੰ ਮੱਧਕਾਲੀ ਚੋਣਾਂ ਹੋਣ ਜਾ ਰਹੀਆਂ ਹਨ। ਕਾਂਗਰਸਮੈਨ, ਸੈਨੇਟ, ਗਵਰਨਰ, ਅਸੈਂਬਲੀਮੈਨ, ਸਟੇਟ ਸੈਨੇਟਰ, ਮੇਅਰ, ਕੌਂਸਲਰ, ਸਕੂਲ ਬੋਰਡ, ਸੈਕਟਰੀ ਆਫ ਸਟੇਟ ਤੋਂ ਇਲਾਵਾ ਹੋਰ ਵੀ ਬਹੁਤ ਸਾਰੀਆਂ ਸੀਟਾਂ ਲਈ ਚੋਣਾਂ ਹੋਣੀਆਂ ਹਨ। ਅਮਰੀਕਾ ਵਿਚ ਮਿੱਥੀ ਚੋਣ ਤਰੀਕ ਤੋਂ 1 ਮਹੀਨਾ ਪਹਿਲਾਂ ਹੀ ਘਰਾਂ ਵਿਚ ਬੈਲੇਟ ਪੇਪਰ ਪਹੁੰਚ ਜਾਂਦੇ ਹਨ। ਵੋਟਰ ਆਪਣੀ ਵੋਟ ਦਾ ਇਸਤੇਮਾਲ ਡਾਕ ਰਾਹੀਂ ਵੀ ਕਰ ਸਕਦਾ ਹੈ। ਇਸ ਤੋਂ ਇਲਾਵਾ ਉਹ ਵੋਟਿੰਗ ਦਿਨ ਤੋਂ ਪਹਿਲਾਂ ਕਿਸੇ ਵੀ ਬੂਥ ਵਿਚ ਜਾ ਕੇ ਆਪਣਾ ਬੈਲੇਟ ਪੇਪਰ ਡਰਾਪ ਕਰ ਸਕਦਾ ਹੈ। ਜੇਕਰ ਕਿਸੇ ਕੋਲੋਂ ਗਲਤੀ ਨਾਲ ਬੈਲੇਟ ਪੇਪਰ ਗਵਾਚ ਜਾਂਦਾ ਹੈ, ਤਾਂ ਉਹ 8 ਨਵੰਬਰ ਨੂੰ ਵੋਟਾਂ ਵਾਲੇ ਦਿਨ ਆਪਣੀ ਵੋਟ ਦਾ ਇਸਤੇਮਾਲ ਕਰ ਸਕਦਾ ਹੈ। ਉਹ ਉਥੇ ਜਾ ਕੇ ਹੋਰ ਬੈਲੇਟ ਪੇਪਰ ਦੀ ਵੀ ਮੰਗ ਕਰ ਸਕਦਾ ਹੈ। ਜ਼ਿਕਰਯੋਗ ਹੈ ਕਿ ਹਰ ਵੋਟਰ ਨੂੰ ਸਿਰਫ ਇਕ ਵੋਟ ਪਾਉਣ ਦਾ ਹੀ ਅਧਿਕਾਰ ਹੁੰਦਾ ਹੈ। ਹੇਰਾਫੇਰੀ ਕਰਨ ’ਤੇ ਉਸ ਵੋਟਰ ਖਿਲਾਫ ਕਾਰਵਾਈ ਵੀ ਹੋ ਸਕਦੀ ਹੈ।
ਵੱਖ-ਵੱਖ ਉਮੀਦਵਾਰ ਚੋਣਾਂ ਦੇ ਇਸ ਆਖਰੀ ਪੜਾਅ ਤੋਂ ਪਹਿਲਾਂ ਆਪਣੀ ਜ਼ੋਰ ਅਜ਼ਮਾਇਸ਼ ਕਰ ਰਹੇ ਹਨ। ਬਹੁਤ ਸਾਰੇ ਉਮੀਦਵਾਰ ਘਰ-ਘਰ ਜਾ ਕੇ ਚੋਣ ਪ੍ਰਚਾਰ ਕਰਦੇ ਹਨ। ਇਸ ਤੋਂ ਇਲਾਵਾ ਚੌਕਾਂ ਆਦਿ ’ਤੇ ਉਮੀਦਵਾਰਾਂ ਦੇ ਬੈਨਰ ਅਤੇ ਪੋਸਟਰ ਆਮ ਹੀ ਵੇਖਣ ਨੂੰ ਮਿਲਦੇ ਹਨ। ਜ਼ਿਕਰਯੋਗ ਹੈ ਕਿ ਇਹ ਮੱਧਕਾਲੀ ਚੋਣਾਂ 2 ਸਾਲਾਂ ਬਾਅਦ ਹੁੰਦੀਆਂ ਹਨ। ਇਸ ਦੌਰਾਨ ਅਮਰੀਕਾ ਦੇ ਰਾਸ਼ਟਰਪਤੀ ਲਈ ਵੋਟਿੰਗ ਨਹੀਂ ਹੁੰਦੀ। ਉਸ ਦੇ ਲਈ ਹਰ 4 ਸਾਲ ਬਾਅਦ ਹੀ ਵੋਟਾਂ ਪਾਈਆਂ ਜਾਂਦੀਆਂ ਹਨ। ਮੌਜੂਦਾ ਰਾਸ਼ਟਰਪਤੀ 2024 ਤੱਕ ਆਪਣੀ ਅਹੁਦੇ ’ਤੇ ਬਣਿਆ ਰਹੇਗਾ।
