ਵਾਸ਼ਿੰਗਟਨ/ਰੋਪੜ (ਰਾਜ ਗੋਗਨਾ)— ਸ੍ਰੀ ਆਨੰਦਪੁਰ ਸਾਹਿਬ ਤੋਂ ਸੰਸਦ ਮੈਂਬਰ ਅਤੇ ਸਾਬਕਾ ਕੇਂਦਰੀ ਮੰਤਰੀ ਮਨੀਸ਼ ਤਿਵਾੜੀ ਨੇ ਕੇਂਦਰੀ ਊਰਜਾ ਮੰਤਰਾਲੇ ਵੱਲੋਂ ਪੰਜਾਬ ਵਿੱਚ ਕੋਲਾ ਰੇਲ ਮਾਰਗ ਦੀ ਬਜਾਏ ਅਡਾਨੀ ਪੋਰਟ ਰਾਹੀਂ ਲਿਆਉਣ ਦੇ ਹੁਕਮਾਂ ਕਾਰਨ ਸੂਬੇ ਨੂੰ ਹੋਣ ਵਾਲੇ ਵਿੱਤੀ ਨੁਕਸਾਨ ਦਾ ਮੁੱਦਾ ਉਠਾਇਆ ਹੈ, ਜਿਸ ਨਾਲ ਸੂਬੇ ਵਿੱਚ ਬਿਜਲੀ ਉਤਪਾਦਨ ਦੀ ਲਾਗਤ ਚ ਵਾਧਾ ਹੋਇਆ ਹੈ।ਸੰਸਦ ਵਿੱਚ ਇਹ ਮੁੱਦਾ ਉਠਾਉਂਦੇ ਹੋਏ, ਸੰਸਦ ਮੈਂਬਰ ਮਨੀਸ਼ ਤਿਵਾੜੀ ਨੇ ਕਿਹਾ ਕਿ ਪੰਜਾਬ ਸੂਬਾ ਬਿਜਲੀ ਪੈਦਾ ਕਰਨ ਲਈ ਮਹਾਨਦੀ ਕੋਲਫੀਲਡਸ ਤੋਂ ਕੋਲਾ ਲੈਂਦਾ ਹੈ। ਜੇਕਰ ਇਸ ਕੋਲੇ ਨੂੰ ਪਹਿਲਾਂ ਦੀ ਤਰ੍ਹਾਂ ਰੇਲ ਮਾਰਗ ਰਾਹੀਂ ਸਿੱਧਾ ਪੰਜਾਬ ਲਿਆਂਦਾ ਜਾਵੇ, ਤਾਂ ਦੂਰੀ 1830 ਕਿਲੋਮੀਟਰ ਬਣਦੀ ਹੈ। ਪਰ ਕੇਂਦਰੀ ਊਰਜਾ ਮੰਤਰਾਲੇ ਨੇ 30 ਨਵੰਬਰ, 2022 ਨੂੰ ਪੰਜਾਬ ਸਰਕਾਰ ਨੂੰ ਪੱਤਰ ਲਿਖ ਕੇ ਕੋਲਾ ਸਿੱਧਾ ਰੇਲ ਮਾਰਗ ਰਾਹੀਂ ਲਿਆਉਣ ਦੀ ਬਜਾਏ ਪਾਰਾਦੀਪ ਦੀ ਬੰਦਰਗਾਹ ‘ਤੇ ਲਿਜਾ ਕੇ ਸ੍ਰੀਲੰਕਾ ਦੇ ਰਸਤੇ ਦਹੇਜ ਅਤੇ ਮੁੰਦਰਾ ਸਥਿਤ ਅਡਾਨੀ ਪੋਰਟ ‘ਤੇ ਉਤਾਰਨ ਲਈ ਕਿਹਾ ਹੈ | ਫਿਰ ਇਹ ਕੋਲਾ ਅਡਾਨੀ ਪੋਰਟ ਤੋਂ 1500 ਕਿਲੋਮੀਟਰ ਦੂਰ ਰੇਲ ਮਾਰਗ ਰਾਹੀਂ ਪੰਜਾਬ ਲਿਆਂਦਾ ਜਾਵੇਗਾ।ਉਨ੍ਹਾਂ ਦੋਸ਼ ਲਾਇਆ ਕਿ ਕੇਂਦਰੀ ਊਰਜਾ ਮੰਤਰਾਲੇ ਨੇ ਅਡਾਨੀ ਨੂੰ ਫਾਇਦਾ ਪਹੁੰਚਾਉਣ ਲਈ ਸਿੱਧੇ ਤੌਰ ’ਤੇ ਪੰਜਾਬ ਸਰਕਾਰ ਅਤੇ ਪੰਜਾਬ ਦੇ ਲੋਕਾਂ ਨਾਲ ਵਿਤਕਰਾ ਹੈ। ਇਸ ਕਾਰਨ ਕੋਲੇ ਦੀ ਢੋਆ-ਢੁਆਈ ਦੀ ਲਾਗਤ 4350 ਰੁਪਏ ਪ੍ਰਤੀ ਟਨ ਤੋਂ ਵਧ ਕੇ 6750 ਰੁਪਏ ਪ੍ਰਤੀ ਟਨ ਹੋ ਗਈ ਹੈ। ਜਿਸ ਨਾਲ ਬਿਜਲੀ ਦੇ ਇੱਕ ਯੂਨਿਟ ਦੀ ਕੀਮਤ 3.60 ਰੁਪਏ ਤੋਂ ਵਧ ਕੇ ਕਰੀਬ 5 ਰੁਪਏ ਹੋ ਗਈ ਹੈ। ਉਨ੍ਹਾਂ ਸਰਕਾਰ ਨੂੰ ਪੁਰਜ਼ੋਰ ਅਪੀਲ ਕੀਤੀ ਕਿ ਪੰਜਾਬ ਪ੍ਰਤੀ ਇਸ ਪੱਖਪਾਤੀ ਪੱਤਰ ਨੂੰ ਵਾਪਸ ਲਿਆ ਜਾਵੇ ਅਤੇ ਮਹਾਨਦੀ ਕੋਲਡਫੀਲਡਸ ਤੋਂ ਕੋਲਾ ਸਿੱਧੇ ਰੇਲ ਮਾਰਗ ਰਾਹੀਂ ਪੰਜਾਬ ਲਿਆਉਣ ਦੀ ਇਜਾਜ਼ਤ ਦਿੱਤੀ ਜਾਵੇ।
